கடத்தல் வாகனம் மோதியதில் மாணவன் படுகாயம்!

tamil news: முல்லைத்தீவு, புதுக்குடியிருப்பு பிரதேசத்திற்குட்பட்ட உடையார்கட்டு பகுதியில் தேக்கு மரக்குற்றிகளை கடத்திச்சென்ற 'ஹயஸ்' ரக வாகனம் மாணவன் ஒருவரை மோதியுள்ளது.

நேற்றுமுன்தினம்(02.07.2024) இரவு இடம்பெற்ற குறித்த வாகன விபத்தில் உயர்தர வகுப்பு மாணவன் படுகாயம் அடைந்துள்ளார்.

சம்பவம் தொடர்பில் மேலும் தெரியவருவதாவது,

புதுக்குடியிருப்பு - பரந்தன் வீதியில் பிரத்தியேக வகுப்பினை முடித்துவிட்டு மிதிவண்டியில் பயணித்த மாணவன் மீது வேகமாக சென்ற 'ஹயஸ்' ரக வாகனம் மோதி விபத்தினை ஏற்படுத்தியுள்ளது.

இதனையடுத்து சட்டவிரோதமான முறையில் வாகனத்திற்குள் தேக்க மரக்குற்றிகள் 9 காணப்பட்டுள்ளன.

இவை புதுக்குடியிருப்பு பிரதேசத்திலிருந்து யாழ்ப்பாணத்திற்கு கடத்திசெல்லப்பட்ட மரக்குற்றிகள் என காவற்துறை விசாரணைகளில் தெரியவந்துள்ளது.

குறித்த மாணவன் சிகிச்சைக்காக முல்லைத்தீவு மாவட்ட மருத்துவமனை கொண்டு செல்லப்பட்டு,

மேலதிக சிகிச்சைக்காக யாழ்ப்பாணம் போதனா வைத்தியசாலைக்கு மாற்றப்பட்டுள்ளார்.

தொடர்ந்து வாகனத்தின் சாரதி கைதுசெய்யப்பட்டு புதுக்குடியிருப்பு காவற்துறையினால் முல்லைத்தீவு மாவட்ட நீதவான் நீதிமன்றில் முன்னிலைப்படுத்திய நிலையில் சந்தேகநபரை எதிர்வரும் 16ம் திகதிவரை விளக்கமறியலில் வைக்குமாறு நீதிமன்றம் உத்தரவிட்டுள்ளது.

சம்பவம் தொடர்பில் மேலதிக விசாரணைகளை புதுக்குடியிருப்பு காவற்துறை மேற்கொண்டு வருகின்றது.