இன்று நள்ளிரவுடன் பிரச்சார நடவடிக்கைகளுக்கு முற்றாக தடை!!!

tamil news: எதிர்வரும் 21ம் திகதி இடம்பெறவுள்ள இலங்கை ஜனாதிபதித்தேர்தலுக்கான பிரச்சாரக் காலம் இன்று(18.09.2024) நள்ளிரவுடன் நிறைவடைவதுடன்,

அதன்பிறகு எந்தவொரு தனிநபரோஃ குழுக்களோ வேட்பாளர்களை பிரச்சாரம் செய்வது, ஊக்குவிப்பது போன்றன தேர்தல் சட்டங்களை மீறும் செயலாகும் எனவும் தேர்தல் ஆணையாளர் நாயகம் சமன் ஸ்ரீ ரத்நாயக்க எச்சரிக்கை விடுத்துள்ளார்.

தொடர்ந்து அவர் கருத்துத்தெரிவிக்கையில்,

"நியாயமான மற்றும் சுதந்திரமான தேர்தல் நடைமுறையை உறுதிசெய்வதற்காக கடுமையான விதிமுறைகள் நடைமுறையில் உள்ளன.

பிரச்சார காலம் முடிவடைந்தவுடன் பொது பேரணிகள், விளம்பர பொருட்கள் விநியோகம் அல்லது வீடுவீடாக பிரச்சாரம் செய்ய அனுமதிக்கப்படாது. 

எந்தவொரு பிரச்சாரத்திற்கும் எதிராக நடவடிக்கை எடுக்க காவற்துறைக்கு அறிவுறுத்தல்கள் வழங்கப்பட்டுள்ளது."

என அவர் குறிப்பிட்டார். 

இதேவேளை பிரதான ஜனாதிபதி வேட்பாளர்களான பா. அரியநேந்திரன், ரணில் விக்கிரமசிங்க, சஜித் பிரேமதாச, அனுரகுமார திசாநாயக்க, நாமல் ராஜபக்ச, திலித் ஜயவீர மற்றும் நுவன் போககே ஆகியோர் கொழும்பில் தேர்தல் பிரச்சாரக் கூட்டத்தை இன்று(18.09.2024) நடத்தவுள்ளனர்.

இதனையடுத்து கொழும்பு நகரின் பாதுகாப்பு பலப்படுத்தப்பட்டு விசேட போக்குவரத்து ஏற்பாடுகளும் செய்யப்பட்டுள்ளன.

தமிழ்ப்பொது வேட்பாளர் பா. அரியநேந்திரன் அவர்களுடைய தேர்தல் பிரச்சாரக்கூட்டம் பம்பலம்பிட்டி ஹோட்டல் வெஸ்ற்றேன் இல் இன்று மாலை 5.30 மணிக்கு இடம்பெறவுள்ளது.

ஐக்கிய மக்கள் சக்தியின் ஜனாதிபதி வேட்பாளர் சஜித் பிரேமதாசவின் தேர்தல் பிரச்சாரக் கூட்டம் மருதானை காவற்துறைப் பிரிவுக்குட்பட்ட பஞ்சிகாவத்தை வீதி டவர் மண்டபத்துக்கு முன்பாக இன்று பிற்பகல் 2 மணிக்கு இடம்பெறவுள்ளது.

சுயேட்சை வேட்பாளர் ரணில் விக்கிரமசிங்கவின் தேர்தல் பிரச்சாரக்கூட்டம் கொழும்பு கிரான்ட்பாஸ் காவற்துறைப் பிரிவுக்குட்பட்ட கொஸ்கஸ் சந்தியில் இன்று பிற்பகல் 2 மணிக்கு இடம்பெறவுள்ளது.

தேசிய மக்கள் சக்தியின் ஜனாதிபதி வேட்பாளர் அனுரகுமார திசாநாயக்கவின் தேர்தல் பிரச்சாரக் கூட்டம் மிரிஹான காவற்துறைப் பிரிவுக்குட்பட்ட நுகேகொட ஆனந்த சமரகோன் மைதானத்தில் இன்று பிற்பகல் 2 மணிக்கு இடம்பெறவுள்ளது.

ஸ்ரீ லங்கா பொதுஜன பெரமுனவின் ஜனாதிபதி வேட்பாளர் நாமல் ராஜபக்ஷவின் தேர்தல் பிரச்சாரக் கூட்டம் பிலியந்தல காவற்துறைப் பிரிவுக்குட்பட்ட சோமவீர சந்திரசிறி மைதானத்தில் இன்று பிற்பகல் 2 மணிக்கு இடம்பெறவுள்ளது.

சர்வஜன அதிகார ஜனாதிபதி வேட்பாளர் திலித் ஜயவீரவின் இறுதி தேர்தல் பிரச்சாரக் கூட்டம் இன்று பிற்பகல் 2 மணிக்கு கொட்டாவ பிரதான பேருந்து நிலையத்தில் இடம்பெறவுள்ளது.

மேலும் மக்கள் போராட்ட முன்னணியின் ஜனாதிபதி வேட்பாளர் நுவன் போபகேவின் தேர்தல் பிரச்சாரக் கூட்டம் கிரிபத்கொட பகுதியில் இன்று பிற்பகல் 3 மணிக்கு இடம்பெறவுள்ளமை குறிப்பிடத்தக்கது.